“𝗦𝗼𝗹𝗶𝗱 𝗣𝗗𝗣, 𝗯𝗮𝗵𝗮𝗴𝗶 𝗻𝗴 𝗠𝗶𝗻𝗼𝗿𝗶𝘁𝘆: 𝘄𝗮𝗹𝗮𝗻𝗴 𝗶𝘄𝗮𝗻𝗮𝗻 𝘀𝗮 𝘀𝗲𝗿𝗯𝗶𝘀𝘆𝗼𝗻𝗴 𝗺𝗮𝘆 𝗺𝗮𝗹𝗮𝘀𝗮𝗸𝗶𝘁 𝗮𝘁 𝗽𝗮𝗻𝗶𝗻𝗶𝗻𝗱𝗶𝗴𝗮𝗻!”

Bilang isang miyembro ng Duterte bloc, kabilang kaming mga solid na PDP Senators, naninindigan ako sa aming desisyon, prinsipyo at mga ipinaglalaban kung kaya’t magkakasama pa din kami ngayon sa minority bloc ng Senado.

Kilala niyo ako, mula noon hanggang ngayon, hinding hindi ko ugaling mang-iwan. Trabaho at serbisyo ang focus ko, hindi pulitika. Palaging mananaig sa akin kung ano ang makabubuti sa sambayanang Pilipino na aking pinagsisilbihan.

Pagkatapos na pormal na maihalal si Sen. Tito Sotto na Senate President, nagbigay-galang ako sa kanya at sa ilang mga kasamahan niya sa Majority bloc upang ipahiwatig ang aking willingness to cooperate and work with them bilang kapwa senador kahit na may pagkakaiba kami sa opinyon sa iilang mga bagay.

Napatunayan ko na naman sa kanila noon na mabait akong katrabaho, nakikisama, at nakikipagtulungan. Sinabi ko sa kanila na I am the least of their worries. Hindi ako magiging problema dahil nais ko lang magtrabaho at magserbisyo sa abot ng aking makakaya.

Nais kong klaruhin sa lahat na wala akong sinabing gusto kong sumama sa kanila. Sa oras na nagkausap kami, tapos na ang laban, sapat na ang boto, at naihalal na siya bilang bagong SP. Hindi rin naman nila kami kinausap prior to the change in leadership upang hingin ang aming suporta kaya walang punto o katotohanan na ninais kong pumirma in favor sa kanila. Ang pagpapakumbaba ko sa harap nila ay sumisimbulo lamang ng aking pagnanais na maiwasan ang away-pulitika dahil hindi ito nakakatulong.

Kaugnay rin sa pagpalit ng SP ang usaping Committee assignments, kasama na ang aking pagiging Chairperson ng Health Committee na aking tinutukan ng anim na taon simula 2019 kung kailan si Sen. Sotto rin ang SP noon. Totoo na umapela ako kung pwedeng hindi ako mapalitan dahil kalusugan ang aking pangunahing adbokasiya. Hindi ito napagbigyan at nagdesisyon sila na ibigay ito kay Sen. Risa Hontiveros. Nirerespeto ko iyon kahit na nakakalungkot pero ganyan talaga ang buhay. Patuloy pa rin naman nating isusulong na maisaayos at mailapit ang serbisyong kalusugan sa mga Pilipino.

Sa panghuli, nais kong ibahagi sa lahat na isang collegial body ang Senado na aking kinabibilangan. Dapat naming respetuhin ang opinyon ng isa’t isa at ang kung ano ang nais ng nakararami dahil sumasalamin ito sa demokrasya na aming dapat protektahan bilang mambabatas.

Gayunpaman, anuman ang mangyari sa mundo ng pulitika, hindi magbabago ang prinsipyo at paninindigan ko lalo na ang mga natutunan ko kay Tatay Digong. Patuloy akong magseserbisyo sa inyo sa abot ng aking makakaya at umaasa ako na sana ay magkaisa na tayo para sa ikabubuti ng bansa.

— Senator Bong Go